21 лютага - Міжнародны дзень РОДНАЙ МОВЫ
Другі год калектыў Казлоўшчынскай сярэдняй школы ўдзельнічае ў эксперыменце “Апрабацыя мадэлі фарміравання нацыянальна-культурнай ідэнтычнасці ў вучняў у рамках дзейнасці ўстановы адукацыі як сацыякультурнага цэнтра”. У яго рамках школа працуе як сацыякультурны цэнтр. Праводзяцца тыдні беларускай мовы і літаратуры, тыдні нацыянальнай культуры, інтэграваныя ўрокі, падарожжы, сустрэчы з мясцовымі паэтамі і пісьменнікамі і іншыя мерапрыемствы, якія накіраваны на выхаванне ў навучэнцаў любові да роднага краю, фарміраванне духоўных каштоўнасцей, з’яўляюцца неад’емнай часткай адукацыйнага-выхаваўчага працэсу ва ўстанове адукацыі.
21 лютага Міжнародны дзень роднай мовы прайшоў ў нашай школе пад дэвізам:
“Сто разоў шукай другой красы.
І тым больш, што свет даўно не вузкі!
… Ды калі ты не бязродны сын –
Гавары са мной па-беларуску!”
Настаўнікі беларускай мовы Ламака І.А. і Саўко Н.І. разам з вучнямі арганізавалі і правялі акцыю “Размаўляй па-беларуску!". З раніцы вучні восьмых класаў сустракалі сваіх сяброў і настаўнікаў прыгожымі прывітаннямі на беларускай мове і віншавалі з Днём роднай мовы. У падарунак кожны атрымаў чароўную рукавічку са словамі: “Мова родная ўсеабдымная. Размаўляйце па-беларуску”. У пасёлку вучні дзявятых класаў раздавалі інфармацыйныя лісты і віншавалі жыхароў з Міжнародным днём роднай мовы. Прахожыя выказалі шмат добрых слоў у адрас роднай мовы. Некаторыя нават прачыталі вершы беларускіх пісьменнікаў, што некалі вывучалі ў школе.
Прыемна гучала беларуская гаворка на перапынках у класах і настаўніцкай. Вучні з цікавасцю знаёміліся з новымі словамі: у гардэробе назвы адзення былі напісаны на беларускай мове. У кабінеце біялогіі можна было пазнаёміцца з назвамі лекавых раслін. Цікава і захапляльна прайшоў гэты дзень для настаўнікаў і вучняў.
Давайце прыкладзём усе намаганні, каб наша беларуская мілагучная мова ніколі не стала для нас іншаземкай!
